Revelation of John 9
1Togolima dangada di langi ga ili dana buu-‘trumpet’. Gei au ga mmada gi di heduu dela ne doo ia gi henuailala, ga wanga ginai di gii o di lua dono dua ai. 2Di heduu ga huge di lua deelaa, gei nia huiahi ga buu aga, e hai gadoo be nia huiahi mai di gowaa haga mahana mee damana. Di maalama o di laa mo di ahiaalangi la gu haga bouli go nia huiahi mai di lua deelaa. a 3Nia manu-‘locust’ ga lloomoi gi hongo henuailala mai i lodo nia huiahi aalaa, ga wanga ginai nia mogobuna be nia mogobuna o nia manu-“scorpion”. b 4Nia manu-‘locust’ ga helekai ginai bolo ginaadou gi hudee hunahuna ina nia geinga be go nia laagau, be go di ingoo hua nia laagau ala i golo. Digaula e mee hua di hunahuna nia daangada ala digi maaga ginai di hagailongo o God i hongo nadau lae. c 5Nia manu-‘locust’ la digi dumaalia ginai gi daaligidia nia daangada aanei gi mmade, e dumaalia hua gi haga mmaemmae ina digaula i lodo nia malama e lima. Di mmae o di haga mmaemmae deenei, le e hai be di mmae ne hai go di manu-“scorpion”. 6I lodo nia malama e lima aalaa, gei nia daangada ga halahala di nadau hai gi mmade ai ginaadou, gei deemee. Digaula ga hiihai bolo ginaadou gi mmade, gei di made la ga hana gi daha mo digaula. d7Nia manu-‘locust’ le e hai gadoo be nia hoodo ala gu togomaalia ang gi tauwa. I hongo nia libogo digaula, la nia mee e hai gadoo be nia hau goolo, nia hadumada digaula e dina gi nnadumada dangada. e 8Nadau ngaahulu le e dina gi nia ngaahulu libogo ahina, nia niha digaula le e dina gi nia niha laion. f 9Nadau hadahada le e duuli gi nia mee haaligi hadahada baalanga, gei di lee ne hai go nadau bakau le e hai gadoo be di lee o nia waga hongo henua logowaahee e llele hagalimalima gi tauwa. g 10Digaula nadau hugu mo nadau mee dadaalo dangada, gadoo be di hugu manu-“scorpion”, aanei go nadau hugu e mogobuna di haga mmaemmae nia daangada i lodo nia malama e lima. 11Digaula di nadau king e dagi ginaadou dela go tangada di langi dela e dagi di lua dono dua ai. Di ingoo o maa i telekai Hebrew bolo “Abaddon”, i telekai Greek bolo “Apollyon”, dono hadinga e hai boloo, “Tangada Oho Mee”. 12Di hagamadagudagu dangada matagidagi la gu lawa, i muli nia mee aanei nia hagamadagudagu dangada e lua e lloomoi i golo.
13Togo ono dangada di langi ga ili dana buu-‘trumpet’. Gei au ga longono di lee e hanimoi i nia madaaduge e haa o di gowaa dudu tigidaumaha ne hai gi nia goolo, dela e duu i mua o God. h 14Di lee deelaa ga helekai gi togo ono dangada di langi, “Haga maahede ina digau di langi dogohaa ala e lawalawa i taalinga di monowai damana Euphrates!” 15Digau di langi dogohaa la gu haga maahede. Digaula ne hagatogomaalia ang gi di aawaa deenei, di laangi deenei, di malama deenei, mo di ngadau deenei, belee daaligi dahi baahi e dolu o nia daangada huogodoo gi mmade. 16Au ne haga iloo ginai bolo di hulu gau dauwa llele hoodo la digau e lua lau guli(200,000,000). 17I lodo dagu moe, au ne mmada gi nia hoodo mo digau e llele ai. Nia baalanga ala e haaligi nia hadahada digaula la gu mmee gadoo be di ahi, e halatee be di hadu hagalabagau ‘sapphire’, gei e loubuge be nia “sulfur”. Nia libogo o nia hoodo e dina gi nia libogo laion, gei nia ulaula ahi, nia huiahi mo nia “sulfur” e lloomoi i lodo nadau ngudu. 18Dahi baahi e dolu o nia daangada la ne daaligi gi mmade go nia hagaduadua e dolu aanei: di ahi, di huiahi mo nia “sulfur”, ala nogo lloomoi mai i lodo nia ngudu o nia hoodo. 19Nadau mogobuna la i-lodo nadau ngudu mo i lodo nadau hugu. Nia hugu le e hai be nia gihaa ala nadau libogo, gei digaula e haga mmaemmae nia daangada gi nadau hugu.
20Nia daangada ala i golo, ala digi daaligidia go nia hagaduadua aanei, digaula digi huli gi daha mo nadau mee ala ne bida hai go ginaadou. Digaula digi dugua nadau hai daumaha ang gi nia hagataalunga huaidu, be go nia ada balu god ala ne hai gi nia goolo, silber, baalanga mmee, hadu mo laagau, ala e deemee di mmada, hagalongo be taele. i 21Digaula digi dugua labelaa nadau dadaaligi dangada, nadau haihai buubuu, nadau haihai be di manu, be go nadau haihai gaiaa.
Copyright information for
KPG